Status quo ukon wala sang pagbag-o sa travel guidelines sang Bacolod.
Suno kay Em Ang, executive director sang Emergency Operations Center, napaidalom sa alert level 2 ang Bacolod gani wala sang may madugang nga restrictions.
Pero ila sa gihapon ipatuman ang hugot nga border control para mapunggan ang pagsaka sang Covid-19 cases sa siudad.
Ang Negros Occidental nga nag anunsyo nga maga require liwat sang RT-PCR test bisan sa mga vaccinated nga pasahero halin sa mga lugar nga napaidalom sa alert level 3, ang gindayaw naman sang grupo sang mga negosyante sumugod Domingo.
Suno kay Frank Carbon, executive director sang Metro Bacolod Chamber of Commerce And Industry kag isa man ka fastcraft operator, nagalaum sila nga kuntani mangin palarehos ang pagpatuman sang mga tikang sang local government unit sa rehiyon agud mas mapabaskog pa ang kampanya kontra sa virus.
Kasubong sang sa Negros Occidental, iga require man sang probinsya sang Iloilo ang negative RT-PCR test sa mga pasahero nga gikan sa gwa sang Western Visayas sumugod Enero 10.
Igadumili naman ang pagbyahe sang mga pasahero nga halin sa mga lugar nga napaidalom sa alert level 4 kag 5.