Wala sang may natabo nga abduction. Ini ang gin klaro sang San Carlos PNP sa tunga sang naglapta sa social media nga may yara kuno sang gin-abduct nga 28 anyos nga babaye sa Barangy Prosperidad.
Sa press conference nga gin pamununuan ni Lt Col Nazer Canja, iya ginsiling nga ang San Carlos City Police Station paagi sa Tactical Operations Center, ang nag responde sa 911 call sadtong aga sang March 4.
Gani sila ang gilayon nag coordinate sa barangay officials para mapat-od ang impormasyon. Wala labot nga ginbisitahan ang area gin-review man ang mga CCTV footage gikan sa mga estabilsimiento.
Diri nakit-an nga ang gina siling biktima ang naga sakay sa motorsiklo kag hilway man nga naga libot sa lugar. Taliw-as ini sa nag gwa nga impormasyon nga ang biktima ang pwersa nga ginkuha sang mga suspek nga naga sakay sa puti nga van.
Wala man gani sang may nakita nga white van sa cctv video sa amo nga tion.
Las 7:11 sang amo nga gab-i, liwat nag-responde ang pulis sa area matapos makabaton sang report.
Nakit-an ang babaye nga safe sa bakante nga duta malapit sa La Vista Highlands. Siya ang gindala sa police station. Gin-updan siya sang iya nga bana, iloy kag magulang nga babaye.
Suno kay Canja ang insidente nag gwa nga gin-stage kag mahimo nga na impluwensyahan ini sang “financial matters”. Padayon pa ang imbestigasyon sang pulis para mapat-od ang rason sang mga nangin action sang gina siling biktima.
Gina haylo niya man ang publiko nga likawan ang mag post sang wala na verify nga impormasyon sa social media para indi makapatalang.*
[sibwp_form id=1]