Wala sa gihapon sang kaso nga na-file angut sa pagpatay sang pamilya Fausto sa Himamaylan.
Halos pito na ka bulan ang nakaligad sang ginpangtiro sa ila nga balay sa Brgy Buenavista sadtong Hunyo 14, 2023, ang mag-asawa nga Rolly kag Emilda kag duha nila ka menor de edad nga kabataan. Suno kay Commission on Human Rights – Negros Occidental head, Vincent Parra, sa iya nga pag pakig-angut sa Himamaylan PNP, ila sa gihapon ginahulat si Emily ang kamagulangan nga bata sang mga Fausto para mag-file sang kaso. Sang Oktubre ginpahayag ni PNP Provincial Director, Col Leo Pamittan nga nagpahibalo na sa PNP si Emily nga siya ang handa mag lagda sang affidavit para ma file na ang kaso. Suno kay Parra ang reklamo lamang tubtob sa karon nga na-file sa City Prosecutor’s Office sang Himamaylan amo ang grave coercion kag threats batuk sa mga gina alegar katapo sang New People’s Army angut sa gina siling pag-harass nila sa mga saksi sa kaso. Suno kay Parra kun wala man si Emily, sarang makatindong complainant ang PNP kasubong sa iban man nga kaso nga tigayon na file.
“Sa akon lang ya, si Emily indi man gid masiling nga vital sa kaso kay kun lantawon mo wala man to sya gani sa crime scene. Kay dason pa siya nga adlaw na-inform nga napatay ang iya ginikanan kag duha ka utod.
(Indi man siya sir nga mahambal ta nga exactly siya ang ma tindog as complainant?)
Indi man kinahanglan kay may na monitor man kita nga cases nga na-file sang PNP”, suno kay Parra.