Base sa gin pa gwa nga Fare Update Advisory sang tagdumalahan sang Ceres bus sini nga Hwebes, nag balik na sila sa daan nila nga mga rates.
Suno kay Jade Marquez ang media relations officer sang Vallacar Transit Inc., mga tatlo sila ka adlaw nga nagpatuman sang saka sa plete, humalin sang Lunes, Marso 16, kasunod man sang pagtugot sang Land Transportation Franchising and Regulatory Board sang amo nga fare increase.
Nabaton nila late na sang Miyerkules ang memorandum gikan sa LTFRB, kasunod ini sang mando ni Presidente Ferdinand Marcos, Jr., nga naga defer ukon naga paiway sang pagpatuman sang fare increase. Gani, sini nga Hwebes balik na sila sa daan nila nga rates.
Apesar sang pag timbook sang presyo sa gatung, suno kay Marquez, gina pakamaayo sang tagdumalahan sang Ceres Bus nga 100 percent sa gihapon nga operational ang ila nga mga salakyan kag wala sang pag bag-o sa ila nga dispatching time.
“Normal sa gihapon, wala sang changes sa amon nga operation. 100 percent ang amon nga dispatching sang amon nga units, so ara lang kami da sa terminal nga mahulat sa pashero. Tanan, fully operational kami, tanan nga mga units, tanan nga branches”, suno kay Marquez.*
[sibwp_form id=1]