Wala na sang may na record pa nga pig mortality sa probinsya humalin sang gin-report ang kaso sang hog cholera kag ASF sa banwa sang La Castellana sang Setyembre.
Ini suno kay Provincial Veterinarian, Dr Placeda Lemana nga nag siling man nga subong padayon ang disinfection kag monitoring sa probinsya. Regular man ang laboratory testing.
Paathag ni Lemana, dapat sa sulod sang 40 ka adlaw tayuyon ang disinfection. Kun may mga hog farmers man nga naga matu-mato na sa sentinelling gina pangabay niya ang kooperasyon.
“Kaso ang iban indi gid mapunggan naga butang gid sila sang baboy so ang natabo may ara gid man area nga survive gid sila, okay gid. May ara man nga area nga pagbutang nila sang baboy naga masakit ang baboy. It means nga sige-sigehon gyapon ang disinfection, kay amo na aton gina obra subong nga ga disinfect kita nga daily kita ga disinfection, tani for forty days na siya”, suno kay Lemana.
Samtang, estable ang presyo sang karne sang baboy sa mga merkado sa probinsya.
Wala man gina kulang ang supply suno kay Lemana apesar sang mataas nga demand karon nga holidays.
Pinaka mahal nga kilo sang baboy ang na record sa Talisay City kag EB Magalona nga yara sa 315 pesos.