Las sinko pa lang sang kaagahon naglinya na sa gwa sang SM City Mall ang mag iloy nga Rona kag Colline Lazona para kuntani makapabakuna para sa Covid-19.
Lapit na lang sila sa gate sang mall sang ginpahibalo sila nga wala pa ginatugutan ang mga walk-in nga yara sa A4 category pasaka.
“Ang pwede lang anay ma accomodate mga healthcare workers, senior citizen may comorbidities kag OFW nga utugoing”
Gani naghuyhoy man ang abaga sang iloy nga si Rona bangud ini lang man kuntani ang adlaw nga wala siya sang trabaho sa ginabantayan nga baligyaan.
Online teacher ang iya anak.
May pila sa mga nagalinya ang nagpinauli. Pero may iban nga naakig kag suno sa ila bag o lamang sila ginpahibalo.
Tuyo naman kuntani sang mag iloy nga maghalin sa linya. Apang nagpanikasog sila tubtob nga nakalab-ot sa vaccination center sa third floor sang mall.
Ugaling wala sila maglaum nga ini ang ila maabtan.
“Indi kami kabalo kun diin ma line sir,daw wala system tani may number sila nga ginahatag…” suno kay Colline Lazona, anak ni Rona.
Tungod naman sang tension sa vaccination area,may gin deploy na nga mga dugang nga pulis sa lugar. Bisan ang mga mall security nagbulig na
Pahibalo sa mga nagapila para masunod ang physical distancing.
Nahangpan naman pamunuan sang Bacolod Emergency Operation Center nga bangud man sang kakulang sang naga inabot nga supply sang Covid-19 vaccine naga madamo man ang nagapasimpalad nga makapabakuna bisan kutob pa lang sa mga yara sa A1 tubtob A3 category ang pwede ka walk-in para makapabakuna.
Ini bisan pa may yara naman sang gintalana man nga vaccination schedule sa mga kabarangayan.
Lunchtime na pero nagapila gihapon sa mall ang mag iloy nga Lazona. May supply man sang Covid-19 vaccine ukon wala, para sa mag-iloy, nag pasimpalad sila sa gihapon nga basi pa lang mabakunahan na para may panaming batuk sa Covid-19.