Trabaho sa mga government offices kasubong man klase sa tanan nga lebel sa 30 ka mga lugar sa pungsod lakip na ang Negros Occidental ang gin-suspend sang Malacanang.
Sa memorandum nga gin pa gwa sang Office of the President nga gin lagdaan ni Executive Secretary Lucas Bersamin sa authority sang presidente, nakasaad nga sandig sa recommendation sang National Disaster Risk Reduction and Management Council, dala sang padayon nga pagbubo sang ulan tuga sang southwest monsoon, trabaho sa mga government offices kasubong man klase sa tanan nga level ang gina suspend para sa July 23.
Nalakip diri ang mga lugar sa Metro Manila, mga area sa Luzon, mga probinsya sa Panay kag Negros Occidental.
Samtang, ang mga non-vital employees sang mga ahensya nga may essential services ang sarang mag trabaho sa idalom sang alternative work arrangement.
Nagapabilin sa red alert ang Regional Disaster Risk Reduction Management Office tuga sang gina paabot nga pagbubo sang ulan.
Suno kay Office of the Civil Defense Negros Island Regional Director, Donato Sermeno, III, nalakip ang Negros Occidental sa yellow rainfall warning ukon may pagtupa sang 50 to 100mm sang ulan sandig sa advisory sang PAGASA.
Nagakasayuran nga posible ang localized flooding sa mga lugar nga urbanized, mga low lying ukon nanub-an kag yadtong malapit sa mga suba. Posible man ang lanslide.
Suno kay Sermeno sila ang naga paandam na nga daan sa pumuluyo agudto sila ang makapangaman na batuk sa mahimo pagbubo sang ulan.
Sa nagligad lamang nga inadlaw, dala sang southwest monsoon nga gin pabaskog ni bagyo Crising sa Negros Occidental may 44,378 ka pamilya ukon 166,335 ka persona ang apektado sang pag-ulan kag pagbaha.
Sa report sang RDRRMC, 13 ka mga banwa kag siudad sa probinsya, kalabanan sa southern Negros ang labing apektado, isa naman ka LGU sa Negros Oriental ang gin-report ginbaha.
May 13.2 million pesos nga balor sang assistance ang tigayon na release sang mga apektado suno sa RDRRMC.
“Sa Negros Occidental, naka red alert kita gihapon kay nagabantay kita. Ang mostly affected ang Metro Manila kag western side sang Luzon, kag diri sa aton tungod sang southwest monsoon. Panay kag Negros Occidental amo na naka yellow alert kita”, suno kay Sermeno.
