Alas dos pa lang sang kaagahon yara na sa gwa sang Ayala Mall Capitol Central si Carl Winjer Yee kaupod ang iya nga mga kaingod balay.
Manug desi otso anyos na siya kag maka boto na sa madason nga tuig. Suno kay Carl aga pa siya kay luyag niya maka siguro nga tigayon siya nga maka pa rehistro. 300 lang abe ang sarang ma accommodate sang Comelec.
Luyag niya maka boto sang kandidato nga maka bulig sa kahimtangan sang dalan sa ila nga lugar.
Sa salog na lang sila sang mall sang iya nga mga kaupod naglumpiga kag nagpanyaga. Pasalamat sila nga may ginpa dul-ong sa ila nga panyaga ang ila nga punong barangay.
Number 283 naman ang 60 anyos nga si Nenita Alonso sang Barangay Banago. Las tres sang kaagahon sa Bays Center sila nagpila. Nagsaylo sila gilayon sa ayala sang mahibaluan nga wala sang registration didto.
Guarantor siya para sa hinablos niya nga mapa rehistro.
Pila lang sila sa mga nagpila sa sulod sang mall kaina. Ang iban wala mapunggan nga sa salog na lang magpungko sa inoras nga hulatanay.
May mga barangay tanod nga gin deploy sa sulod sang mall para mapatuman ang minimum health protocols.
Si Joemrie Adlaon sako sa pagbalik balik para masiguro nga may social distancing.
May libre man nga face mask nga gina panagtag ang tagdumalahan sang mall.
Tubtob na lamang September 30 ang voters registration. Sa Oktubre masugod na ang filing sang Certificates of Candidacy.