Napaidalom sa Yellow Alert ang Visayas grid karon, Abril 16, base sa advisory sang National Grid Corporation of the Philippines.
Ini kasunod sang forced power outage ukon pag shutdown sang dose ka mga power plants sa Visayas. Paathag ni Michelle Visera ang spokesperson sang NGCP sa Negros, sa masami naka schedule ang shutdown sang mga power plants, kaangay sa tion nga mag patuman sang regular nga maintenance, pero ang power outage karon wala gina paabot ukon naka schedule.
May lima pa gid nga iban nga power plant nga yara sa derated capacity, ukon indi tigayon maka deliver sang full capacity sini.
Sa advisory 1pm to 9pm ang yellow alert.
2,742 megawatts ang available capacity. Ang peak demand naman yara sa 2,440 megawatts.
Gina issue ang yellow alert kun ang operating margin kulang para sa contingency requirement sang transmission grid suno sa NGCP.
“Naka advisory lang kita yellow alert, pero wala pa man be advisory sang rotating power interruption”, suno kay Visera.
Indi man tigayon nga maka kuha sang power supply gikan sa Luzon suno kay Visera bangud yara sa red alert status ang Luzon grid ukon may kakulang man sa supply kasunod man sang forced outage sa pila ka mga planta.