Napatay kahapon ang 53 anyos nga Bise Alkalde sang Dumaguete City nga si Alan Gel Cordova matapos mag collapse samtang naga bisekleta sa atubang SANG isa ka Unibersidad sa siudad.
Suno kay Councilor Joe Kenneth Arbas, abyan kag partymate sang bise alkalde, nagtambong sa isa ka bike for a cause nga activity si Cordova kag sang naga bike pabalik na sa Dumaguete City proper,
siya ang nag collapse kag nag batyag sang chest pain.
Gindala pa siya sa ospital pero wala na matabangan pa ang bise alkalde.
Nag positibo sa COVID-19 si Cordova pero suno kay Arbas, nag negatibo na ini sa virus sang nagligad nga Martes kag siya ang naka balik na sa trabaho sa city hall sang nagligad nga Huwebes.
Gin kasubo man ni Dumaguete City Mayor Felipe Remollo ang pagtaliwan ni Cordova. Si Remollo nga nag positibo man sa COVID-19 kag naka isolate pa tubtob karon.
228 sa karon ang active cases sa Dumaguete City nga amo ang may pinakadamo nga active cases sa Negros Oriental. Sa pinaka ulihi nga data sang Negros Oriental IATF, 405 tanan ang active cases sa probinsya.
Samtang, 100 ang bag-o nga kaso sang COVID-19 ang nadugang sa Negros Occidental. 41 naman ang dugang sa Bacolod City.
1,426 ang total active cases karon sa Negros Occidental kag 1,218 naman ang active cases sa Bacolod.