Matapos nga nagpakighinun-anon ang siudad sang Bacolod sa mga vendors sa North Capitol Road, may lima na sa ila ang tigayon nga nakakuha sang special permit samtang ang iban naman nagasugod na proseso sini.
Suno kay City Administrator Atty. Mark Steven Mayo, may 44 ka mga vendors sila nga na identify nga nagabaligya sa amo nga dalan kag ginhaylo nila ini nga magkuha sang special permit agud mangin legal na ang ila pag baligya.
Ini ang sandig man sa City Ordinance No. 1009 nga naga regulate sa mga ambulant vendors sa siudad kag nagatumod kon sa diin nga mga lugar lang sila makaplastar.
Sa amo man nga ordinansa, ginadumilian ang mga vendors nga magbaligya sa Aguinaldo Street padulong sa National Bureau of Investigation Office.
Kun makakuha na sang permit ang mga vendors nga didto nagaplastar, pangitaan man ini sang siudad sang lugar nga ila maplastran sa North Capitol Road.
Sandig sa pagsulundan sang siudad, ang mga ambulant vendors, indi magbutang sang lamesa kag bangko sa dalan, ilabi na sa mga mayor nga dalanon.
Kada alas 6 tubtob alas 10 sang gab-i lamang pwedi maka baligya ang mga vendors sa North Capitol Road.*
[sibwp_form id=1]