Natapos na kaayo ang fish section sang Burgos Public Market gani nagsugod man balik sa ila mga na award nga pwesto ang mga manugbaligya sa merkado.
Pero ang manug isda nga si Ruben Casipe nagsaka sa opisina sang Market Supervisor bangud indi niya na magamit ang iban sa trese ka mga fish stall nga iya ginadumala sa sulod sang merkado.
Suno kay Atty. Romeo Carlos Ting, Jr., isa lang ka pwesto ang sarang ma award sa isa ka market vendor kag indi niya pwede magamit ang mga nabakante nga stall bisan ginapanag iyahan pa ini sang iya mga himata ukon kakilala.
Sang Oktubre nag pirma sang certificate of recognition ang masobra 1200 ka mga market vendors sang Burgos, Libertad kag Central market kabahin sang tikang sang siudad agud ma validate ang lehitimo nga naga negosyo nga mga vendors sa mga merkado.
Sang nag sugod ang pandemic halos wala naman maka renew sang ila kontrata ang mga market vendors sa siudad suno kay Ting.
Suno sa pila ka mga vendors, may mga naga pa renta sa mas mahal nga presyo sang ila nga pwesto sa merkado sa iban nga tawo. Singkwenta pesos kada adlaw ang gina bayad sang mga vendors nga naga renta sa siudad pero ila ini nga gina pa rentahan sang sais tubtob otso mil pesos sa iban nga vendors wala pa madala ang bill sa kuryente.
Suno kay City Administrator Atty. Boyet Maghari ini ang kabahin sa paghikot nila sang mga requirements para sa lease of contract.
Pinaagi man diri mapat ud sang siudad ang aktwal nga naga negosyo kag nagabayad sang ila utang sa siudad.
Padayon man ang ila nga inventory para mahibaluan kun may mga vendors pa gid nga naga panag-iya sang masobra sa isa ka stall kag gina pa renta sa iban.