Himata sang isa ka Negrense caregiver nga naga trabaho sa Israel ang naga hinyo sang bulig agudto tigayon nga ma contact kag makita ini.
Naga trabaho bilang caregiver sa Tel Aviv, Israel ang 49 anyos nga si Loreta Villarin Alacre.
Suno sa iya nga magulang nga si Annabella Alacre sang Cadiz Viejo, ulihi nila nga na-istorya si Loreta sang Biernes.
Kada gab-i naga video call sila nga mag-utod. Sang Sabado wala na ini tigayon nga nakatawag suno kay Annabella rason nga nabalaka sila.
Day-off ni Loreta Biyernes kag Sabado kag sa masami ini ang naga lagaw.
Sa ila nga impormasyon yadto si Loreta sa music festival kun sa diin nag pang atake ang Hamas militants.
“Ang iya messenger indi na namon ma contact”, suno kay Anabella. Naka contact na sa ila pamilya ang Overseas Workers Welfare Administration, pero as of press time nagahulat sila sa gihapon sang balita sa ila nga utod.
Panawagan sang himata ni Loreta nga kuntani siya ang ma kontak kag makita.
“Kabay pa nga tani mabuligan nga makita ang akon utod didto. Gapangabay man kami sa gobyerno nga makita ang akon utod”, suno kay Annabella.
Sa report sang Philippine Embassy sa Israel as of 12 noon, duha ka mga Pinoy sa Israel ang kumpirmado napatay, tatlo ang missing kag isa ang injured.
Samtang, bukas naman ang Public Affairs Office sang probinsya sa mga maga hinyo sang bulig para sa ila nga himata sa Israel.
Kaina sang aga suno sa PAO wala pa man sang may naka palapit sa ila nga talatapan.
Linkages ukon sila ang mabuligan paagi sa pag pakig-angut man sa nagakaigo nga ahensya ang mabulig sang PAO sa ila.