Union employees nanindugan nga para sa mga member-consumers ang ila ginaplano nga pag untat trabaho. Ini bisan ginakabig sang pamunuan sang Ceneco kag consumer watch group nga premature kag indi kinahanglan ang ila pag-strike batuk sa joint venture agreement.
Ginsiling ni Mary Grace Bermudez, secretary sang Ceneco Union of Rational Employees ukon CURE nga bisan pa may yara sang nagaluntad nga internal dispute sa ila nga hanay desidido sila nga mag strike.
Ang Cure ang nagfile na sang Notice of Strike sa National Conciliation and Mediation Board sa tuyo nga mapamatukan ang ginadihon nga joint venture agreement sa tunga sang Ceneco kag Primelectric Holdings Incorporated.
Samtang, nagpadala man sang notice to explain ang katapo sang Ceneco Member-Consumer- Owners sa pamunuan kag tagdumalahan sang distribution utility.
Suno kay Ernie Pineda, federation president sang Ceneco MCO dapat ipaathag sang katapo sang board of directors kag management ang makabig pagtraidor sa ila mandato sang ginpirmahan ang kasugtanan upod sa Primelectric.
Pahayag ni Ceneco Acting General Manager Atty. Arnel Lapore nga magluwas wala sang mandato si Pineda sa MCO, libelous kag wala sang basehan ang iya nangin pahayag kontra sa JVA.
Taliw-as man suno sa iya ang nangin pahayag ni Pineda sa panindugan sang iban nga MCO officers.
Nangabay man si Lapore sa NCMB nga ma-dismiss ang notice of strike kag mapamensaran sang malapit 320 ka mga katapo sang Cure ang plano nga pag untat trabaho nga sarang maka apekto sa mga konsumedor.
Si Wennie Sancho, secretary general sang Power Watch Negros nagsiling nga premature kag anti-consumer ang plano sang Cure nga mag-strike bangud wala man sang napahalin sa ila sa trabaho.