Underground cabling system kag duha pa ka mga proyekto indi madayon tungod sang pag-nubo sang kantidad sa loan agreement.
May P300M ang igatalana kuntani nga pondo para sa ginadihon nga underground cabling system nga ipatuman sa Lacson Street sa Bacolod City.
Ugaling tungod sang pagnubo sang loan amount nga hulamon sang local government halin sa Development Bank of the Philippines, indi na ini mapondohan pinaagi sa loan upod sa duha pa ka mga proposed development projects sang siudad.
Suno kay Councilor Thaddy Sayson, pamuno sang Committee on Finance sang konseho, mahimo mapaidalom sa public private partnership ang underground cabling system nga amo kuntani ang solusyon sa kampanya batuk sa mga spaghetti wires kag kinawatay sang cable.
Halin sa P5.5B nangin P4.4B ang nakasugtan sang Bacolod City government nga hulamon sa DBP para matigayon ang mga priority projects kabahin diri ang lot acquisition, construction sang legislative building, major city markets, rehabilitation sang daan nga city health centers kag iban pa.
Ang pagnubo sang loan amount epekto man sang pagnubo sang National Tax Allotment sang siudad.
Nagapati si Mayor Albee Benitez nga pinaagi sa sini nga mga proyekto mas mapadasig pa ang pag-uswag sang siudad.