Aprobrado na ni outgoing Mayor Albee Benitez ang underground cabling ordinance nga isa sa mga solusyon sa pagsolbar sang problema sa spaghetti wires ukon nagalaylay nga kable sang kuryente kag telco sa siudad.
Ang Negros Power nga amo ang magapatuman sang proyekto ang nagtalana sang P79M nga pondo para sa construction sang underground cabling system sa dalan Lacson.
Ginapaabot ni Vice-Mayor elect Claudio Puentevella nga nangin pamuno sang Committee on Energy nga masuguran na ang proyekto antes matapos ang tuig.
Nobyembre sang nagligad nga tuig sang ginlunsar ang proyekto.
Pero ginpaathag ni Puentevella nga ginkinahanglan ang negosasyon sa mga telecommunications company kabangdanan nga na-delay ang construction sang proyekto.
Samtang kabahin sa mga naaprobahan nga ordinansa sang alkalde ang pagtukod sang pedestrian-friendly insfrastructure project.
Nalakip sa gin-presentar sadto sang alkalde nga roadmap para sa ginahandom nga supercity ang pedestrian mall nga ginaplano itukod sa reclamation area.