Uncalled for. Ini ang reaksyon ni Atty Jesus Hinlo sa pag resign sang mga opisyales sang Victorias gikan sa Partido Demokratiko Pilipino.
Suno kay Hinlo nga amo ang naga pungko Provincial Council President sang PDP, wala niya gina paabot ang pag-resign nanday Vice Mayor Abelardo Bantug, III kag siyam ka mga konsehal sang Victorias gikan sa partido.Ginsiling sang natungdan nga mga opisyales nga wala sila nakonsulta sa amo nga plano. Wala labot diri ang governance style ni Palanca kag mga decision sini sadto ang wala nagasanto sa subong nga administrasyon kasubong man sa palaabuton nga direksyon sang siudad. Ginsiling ni Hinlo, sa idalom sang consultative democracy kuntani sila ang nag-istorya sa iya bangud premature pa man ang tanan.
Wala pa man gani mabaton ni anay Mayor Francis Frederick Palanca ang amo nga imbitasyon sang PDP, nga kun kinahanglan, siya ang mangin gubernatorial candidate sang PDP. Ginapaabot niya pa kuntani ang suporta nila kay Palanca labi na nga ini ang madugay man nga nag pangalagad sa Victorias City. Sa karon bukas si Hinlo sa pag-istorya. Dugang pa niya, premature pa ang tanan kag mahimo man gani nga matabo nga sila ang maga tuga sang alliance kay Governor Eugenio Jose Lacson kag ini ang ila nga suportahon sa 2025. Wala pa sila sang pat-od nga kandidato magluwas lamang sa pipila ka posisyon. Paathag ni Hinlo, importante ang 2025 mid-term elections, bangud luyag man sang partido nga maplastar ang ila mga kaalyado bilang pagpanghanda sa 2028 presidential elections.
“So far as consultative democracy is concerned they could just have talked to me ahead because premature pa man ang tanan. Wala pa man kabaton si Mayor Palanca sang imbitasyon sang PDP kag sang mga kaupod ko. I think the reaction was uncalled for. Wala ko na gina ekspektar. Of all places nakibot ko nga mga taga Victorias man nga officials. Dapat gani sang nabal-an nila nga gin konsiderar si Wantan, they should have rallied behind him”, suno kay Hinlo.