Maga-release ang Department of Social Welfare and Development sa masunod nga semana sang pinakaulihi nga hagna sang Emergency Cash Transfer para sa mga biktima sang bagyo Tino sa Bacolod City.
Ginkumpirmar ni Mayor Greg Gasataya nga naka-schedule sa Marso 9 tubtob 12 ang payout para sa mga na “left out” nga benepisyaryo gikan sa una nga payout.
Suno kay Gasataya, kapin 82 million pesos ang kabug-osan nga pondo nga ihatag sa 15,199 ka mga qualified beneficiaries sa siudad.
Madamo pa ang mga slightly affected nga wala pa mahatagan sang ila assistance.
Sandig sa record sang Department of Social Services and Development sang Bacolod City, 15,097 pa ka mga slightly affected nga indibidwal ang magabaton sang 5,369 pesos samtang 102 naman nga severely affected ang sarang nga makakuha sang 10,325 pesos.
Ang amo nga payout pagahiwaton sa Villamonte gym, Mansilingan gym, kag Vista Alegre gym.*
[sibwp_form id=1]