Patay na sang maabtan sang kapulisan ang 41 anyos nga trisikad driver nga si Dennis Panigue matapos siya nga gin buno buno sang iya man kaupod nga trisikad driver.
Suno kay Police Captain Leo Estopa, commander sang Police Station 2, updanay inom Domingo sang hapon ang biktima kag ang suspek nga si Judy Enopia.
Ginpapuli na suno sa pulis sang suspek si Panigue bangud tuman na ini ka hubog kag gin manduan nga indi na magbalik.
Naakig suno kay Estopa si Panigue gani nagpauli ini kag nagkuha sang kutsilyo kag ginbalikan si Enopia.
Pag abot ni Panigue dala ang kutsilyo, nagpalagyo si Enopia kag nag kuha man sang kutsilyo suno sa pulis kag nag lautay ang duha.
Sa bahin sang Purok Nangka sa Barangay 3 suno sa pulis na corner ni Enopia ang biktima kag iya na ini ginbuno buno.
Diri man nakuhaan sang isa ka netizen sang video ang insidente kag gina pasa pasahan karon sa social media.
Mag abyanay man lang suno sa pulis ang duha kag ang tuman ka kahulugbon amo lang ang kabangdanan sang ila away nga nag resulta sa pagkapatay ni Panigue.
Gilayon nga na aresto ang suspek.