Nadulaan sang control ang driver sang tricycle kag nakabunggo sa nagasugata nga motorsiklo sa national road nga sakop sang Sitio Kalasag, Barangay Mansablay sa banwa sang Isabela, kagab-i.
Suno kay Lt. Ildefonso Leonardo, deputy chief sang Isabela PNP, nagresulta ang pagbungguanay sa pagkasamad sang pito ka mga persona, lakip na ang duha ka mga drivers, tatlo ka mga menor de edad kag duha ka indibidwal nga naga-edad 36 kag 18 anyos.
Base sa traffic investigation gikan sa Isabela proper kag padulong Barangay Mansablay ang motorsiklo nga ginamaneho sang 20-anyos nga lalaki, kag angkas niya ang iya 18-anyos nga asawa kag 9 ka bulan nila nga bata nga babaye.
Samtang, nagapadulong sa pihak nga lane ang tricycle nga ginamaneho sang 34-anyos nga driver. Sakay sang tricycle ang 36-anyos nga iloy kag duha ka mga minor.
Sang nadulaan sang kontrol ang driver sang tricycle, nagsaylo ini sa pihak nga lane kag nakabunggo sa motorsiklo, nga sakay ang isa ka pamilya.
Gindala ang mga pilason sa Ignacio Lacson Arroyo Memorial District Hospital.