Ginapangabay sang mga drayber sang STADTODA, nga nagabyahe sa Barangay Sum-ag padulong sa Barangay Tabunan, Abuanan kag Dulao sa Bago City nga kun pwede i-reconsider anay sang Bacolod City Transport and Traffic Management Department ukon BTTMD ang pagpanakop sa ila bangud ginaproseso palang ang renewal sang ila prangkisa.
Ini matapos nga nagpatigayon sang operation ang BTTMD sa Barangay Sum-ag nga nag resulta sa pag-impound sang 15 ka mga tricycle nga colorum, 5 ka e-bikes kag 2 ka single nga motor.
Kaina sang aga, nagpadulong ang Presidente sang STADTODA sa talatapan sang BTTMD kaupod ang pila sini ka mga miyembro agud mag apela sa siudad.
Ginsiling ni Gregory Regalado, Presidente sang STADTODA, on hold pa sa karun ang pag-renew sang ila prangkisa bangud gina-ammend pa sang SP ang ordinansa may angut diri.
Dugang niya sa 212 ka mga miyembro sang ila nga asosasyon, 79 palang ang tigayon nga naka-renew sang ila mga business permits.
Sabat naman ni BTTMD Head Atty. Reuben Mikhail Sabig, samtang wala pa ma renew sang SP ang ila prangkisa, kabigon sila sa gihapon bilang colorum, sandig sa layi.
Pagklaro ni Sabig, ang intensyon sang BTTMD amo lamang ang pagpatuman sang anti-colorum ordinance sang Bacolod kag mapabilin nga matawhay ang dalan sa siudad.
Pangabay naman sang BTTMD sa mga natungdan, indi anay magbyahe sa dalan, samtang wala pa sila makarenew sang prangkisa.
[sibwp_form id=1]