Ginapangabay sang grupo nga KNETCO kag UNDOC-PISTON ang Department of Transportation nga kuntani, ila liwat i-review ang partnership sang ahensya sa World Bank tuhoy sa pagpadayon sang Jeepney Modernization Program.
Sa idalum sang partnership sang DOTr kag World Bank, tuyo sini ang pag pasangkad kag pagpadasig sang pagpatuman sang programa nga Public Transport Modernization Program ukon PTMP.
Una ini nga ipatuman sa anum ka mga Highly Urbanized City sa Pilipinas, lakip na ang Bacolod City.
Ginsiling ni Lilian Sembrano, pamuno sang KNETCO nga transport group, nga ila gina pamatukan ang programa bangud mangin dako ini nga halit sa mga traditional jeepney.
Dugang niya, isa lamang ini ka pamaagi sang DOTr agud tigayon na nga madula sa dalan ang mga traditional jeepneys.
Sa idalom sang sini nga programa sang DOTr mga electric vehicle na ang mabiyahe sa dalanon para mapahagan hagan ang polusyon sa palibot.
Posible man suno sa iya nga may route rationalization nga ipatuman sa Bacolod kun sa diin, pagadulaon na ang iban nga mga ruta kag tingbon na lang sa isa ka rota.
Ila man gina pamalabagan ang Automated Fare Collection System, ukon mangin cashless system na ang pag bayad sang plete nga ginaduso sang DOTr.
Ang gina kakulbaan sang grupo kay makapagusto na ang mga private companies nga magpasaka sang plete.
Hwebes nga adlaw, may consultation ang DOTr sa mga drayber kag operators sa siudad, apang ginapaabot nga ila ini sug-alawon sang aksyon protesta.
[sibwp_form id=1]