Traditional jeepney organization ginalauman masuguran ang roll out sang fuel subsidy tuga sang nagasaka nga presyo sang produkto petrolyo.
Ginapaabot sang Bacolod Alliance of Commuters, Operators and Drivers nga makapa-gwa sang memorandum ang Land Transportation Franchising and Regulatory Board angut sa ginhinyo nila nga dugang nga extension sa provisional authority para makabyahe sang legal ang ila mga traditional jeepney units.
Ginsiling ni BACOD chairman Rudy Catedral nga sa madasun nga sinamena ginahulat ang anunsyo kag mando nga maga gikan sa Department of Transportation dungan sa ginalauman nga roll out sang fuel subsidy.
Para kay Catedral importante nga mapalab-ot sa transport sector ang ayuda ilabi na nga kadam-an sa mga traditional jeepney operators ang indi luyag nga magpatuman sang dugang nga saka sa plete.
Ang DOTr kag LTFRB ang nagapakig-angut na sa Department of Energy, Department of the Interior and Local Government kag Land Bank of the Philippines para mapadasig ang proseso sang pag-release sang bulig agud indi labi nga maapektuhan ang transport sector sa pagsaka sang presyo sang petrolyo tuga sang kinagamo sa Middle East.