Pabor ang grupo sang United Negros Drivers and Operator Center-Pagkakaisa ng mga Tsuper at Operator Nationwide ukon UNDOC-PISTON sa pag-suspend ni President Ferdinand Marcos Jr. sa pagpasaka sang plete sa mga public utility vehicles.
Ginsiling ni Rodulfo Gardoce Jr., Chairperson sang UNDOC-PISTON Negros nga nagakadapat lang nga gin-atras ni PBBM ang fare hike bangud indi man ini makahatag sang long-term solution sa padayon nga pagsaka sang presyo sang gatong.
Pangabay man sang mga drivers nga kun tani temporaryo anay nga i-suspend sang gobyerno ang excise tax kag value added tax sa gatong agud indi matam-an ang mga drivers pati na ang Oil Deregulation Law.
Suno kay Eric Bendoy, Secretary General sang UNDOC-PISTON, LGU dapat mismo ang mag-endorse sa gobyerno nasyonal sang eksakto nga listahan sang mga drivers nga maka benepesyo sang 5,000 nga fuel subsidy sa idalom sang Assistance to Individual in Crisis Situation.
Bangud sa pagtimbook sang presyo sang gatong, ang sang una nga 800 to 900 pesos nga ginansya sang mga drivers, yara nalang subong sa 200 tubtob 300 pesos kada adlaw, suno kay Bendoy.
Nagakahangawa man sila nga posibilidad nga indi sila madala sa ayuda sang gobyerno nasyonal bangud halos tanan nga mga drivers sa siudad sang Bacolod, lakip na ang kapin 200 ka mga drivers sang UNDOC-PISTON, wala ma-consolidate.
Panawagan sang grupo nga kinahanlan magpatunga ang lokal nga panguluhan sang Bacolod agud masiguro nga ang tanan nga mga drivers makabaton sang ayuda bilang bulig sa ila ginapangatubang nga kabudlyaan.*
[sibwp_form id=1]