Malapit 1,500 ka mga katapo sang transport organization ginapaabot magbuylog sa rally kontra sa jeepney phase out bwas Disyembre 29.
Isa ka solidarity walk ang pangunahan sang Bacolod Alliance of Commuters, Operators and Drivers ukon BACOD bwas sa las dos sang hapon.
Halin sa Rizal elementary School sa dalan Araneta, maga-martsa ang grupo upod sa katapo sang UNDOC kag katapo sang mga progresibo nga grupo.
Suno kay Rudy Catedral , presidente sang BACOD, ginalauman nila ang pag-upod man sang mga pasahero agud nga mabalabagan ang natalana nga pag-phase out sang traditional jeepney sa tion nga mag-expire na ang ila provisional authority sa Disyembre 31.
Magatipon ang katapo sang transport group sa Fountain of Justice sa atubang sang daan nga city hall.
Nalakip man sa ila panawagan ang pag-rehabilitate sang traditional jeepney kag ang pagdula sang consolidation sang ila mga prangkisa sa tuyo man nga mangin kabahin sang jeepney modernization program.