Nagbalik na ang operation sang Transcom subong nga adlaw matapos ang 48 oras nga notice of suspension nga ginpapanaug sa ila sang Bacolod City Legal Office.
Ini matapos nga nagpositibo sa COVID-19 ang 41 sini nga mga empleyado.
Pero indi pa makabalik ang kadam-an sang mga empleyado sa ila building bangud nagpatigayon pa sang site inspection ang Bacolod Emergency Operations Center kaina sang aga para masiguro nga napatuman na ang mga recommended health protocols.
Sini nga hapon nagsapul ang country manager sang Transcom sa Bacolod EOC.
Samtang, gina usisa karon sang EOC ang isa ka grupo sang mga empleyado sang kumbuyahan nga nagpadulong pa sa Sipalay City sang nagligad nga semana.
Nagapanugyan si Bacolod EOC Executive Director Em Ang sa publiko nga kuntani ipaiway lang anay ang paglagaw sa iban nga mga lugar kun indi man lang importante ang tinutuyo.
“Ipaiway ta lang na anay, that can wait while ari pa kita sa pandemic, indi pa kita tapos kay wala pa kita mabakunahan, diutay nalang gid na nga pasensya. We are almost at the finish line. Ang ini ta lang gusto matabo nga madasma ta before we reach the finish line,” suno kay Ang.
Gina monitor man karon sang Bacolod EOC ang iban nga mga business process outsourcing companies sa Bacolod.
Ginpahayag ni Ang nga madamo sa gihapon nga mg bpo ang wala nagapatuman sang BaCTrac system kag iban nga mga health protocols nga nasaad sa mga ordinansya sang siudad.
“Just be patient kay kun indi na sila mag comply everyday gina monitor namon ang ila log in activity we will name them so that their employees and others will be aware,” suno kay Ang.
Gindugang pa ni ang nga handa sila nga pasakaan sang kaso ang mga BPO nga wala nagasunod sang health protocols.