Pamuno sang Bacolod Traffic Authority Office nagpaandam sa mga traffic enforcers nga indi pagbayaan ang ila mga pwesto karon nga naga-gutok ang lakat sang trapiko sa mga mayor nga dalanon sang siudad.
Bisan may regulated truck ban makit-an sa gihapon ang pag tinirin-tirin sang mga truck sa dalan circumferential. Kabahin ini sa mga problema sa pagpatuman sang pagsulundan nga luyag ni Police Major Junji Liba nga tagaan atensyon sang mga traffic enforcers sa dalan. Gin-manduan na ni Liba ang mga enforcers nga istriktohon ang pagpatuman sang 5-minute interval para sa mga naga-alagi nga truck agud nga mapahagan-hagan ang pag-gutok sang lakat sang trapiko ilabi na sa mga mayor nga dalanon.
Nahangpan ni Liba nga pila sa mga traffic enforcers nga job order workers ang mahimu wala pa makabaton sang sweldo halin sa siudad. Pero nagpaandam na siya sa ila nga indi gid magbiya sa ila pwesto ilabi na kun peak hours kag kinahanglan ang ila pagserbisyo. Ang buddy system kabahin lang sa ginapatuman sang BTAO agud mapasiguro nga indi madulaan sang enforcer ang mga lugar mga masami naga-ginutok ang salakyan.