Task Force Kontra Colorum ang maga panakop sumugod Pebrero 20. Ini kasunod sang reklamo sang mga tricycle drivers nga kadamo sang naga biyahe nga mga tricycle nga wala sang permit.
Natungod man sang reklamo sang mga lehitimo nga mga tricycle drivers and operators association magatukod sang Task Force Kontra Colorum Tricycles ang siudad nga amo ang magahatag atensyon sa pagpanakop sang mga tricycle nga naga-byahe out of route kag wala sang franchise.
May 82 ka mga association ang mga tricycle kag drivers operators sa Bacolod kag indi magnubo sa 6,000 tubtob 7,000 ka mga driver/operators ang sarang maapektuhan kun suguran na ang pagpanakop sang task force sa Pebrero 20. Plano naman ni Mayor Albee Benitez nga hayluhon ang mga tricycle drivers nga sarang madulaan sang palangabuhian nga magserbe nga manug hakot sang basura sa mga kabarangayan.
Nagapati ang alkalde nga dako ang mabulig sang mga tricycle drivers nga masami ginasugo maghakot kag maghaboy sang mga basura sang mga residente nga nagapuyo sa lugar nga indi mahapos makadtuan sang dump truck sang IPM-CDC.
Sa public hearing sang committee on transportation naghinyo man sang bulig ang katapo sang Central Area Tricycle Operators and Drivers Association bangud masami naga kadulaan na sila sang pasahero indi lang bangud sang colorum tricycles kundi tungod nagasulod naman sa ila mga rota ang mga modernized jeepneys.