Pamuno sang Task Force Disiplina ang nagapanawagan sa konseho sang Bacolod sa pagbutang sang multa sa mga establisimiento komersyal nga wala naga require sang ila mga customers nga magsuksuk sang face shield.
Ginpahayag sang pamuno sang task force nga si Wilfredo Geolingo nga sa ila paglibot sa mga merkado kag downtown area sang Bacolod kahapon, madamo sa gihapon ang wala nagasuksuk sang face shield.
May iban man nga indi husto ang pagsuksuk sang face shield bangud ila lamang ini ginabutang sa ibabaw sang ila ulo.
Isa-isa nga ginsulod sang task force ang mga baligyaan nga may mga customer nga wala nagasuksuk sang face shield kag ginpahanumdum nga estrikto nga ipatuman ang ordinansa sa pagsuksuk sang face shield magluwas sang face mask sa mga pampubliko nga lugar.
Suno kay Geolingo indi dapat magkumpiyansa ang publiko nga manubo na ang kaso sang COVID-19 sa siudad kundi dapat magsunod sa minimum health protocols.
Nagapanawagan man siya sa sangguniang panglungsod nga i-amend ang ordinansa sa pagsuksuk sang face mask kag face shield para multahan ang mga tag-iya sang establisimiento nga wala nagapatuman sang minimum health protocols.