Task Force Disiplina ang nag inspection sa mga bus kag pampubliko nga salakyan nga gikan sa sur nga bahin sang Negros Occidental.
Nagbantay sang mga naga inabot nga bus kag double tire sa Bacolod South Terminal ang mga katapo sang task force kag ila ginsaway ang mga pasahero nga wala nagasunod sang minimum health protocols nga pagsuksuk sang face mask kag face shield.
Ila man ginsaway ang mga driver nga wala nagasunod sa minimum nga kadamuon sang mga pasahero para masunod ang physical distancing sa sulod sang salakyan.
Suno sa pamuno sang task force nga si Wilfredo Geolingo, kun wala naga require sang face shield ang iban nga mga banwa kag siudad dapat nga sundon ini sang mga pasahero nga nagakadto sa Bacolod.
Sa idalum sang ordinansa sang Bacolod, ang mga wala nagasunod sa minimum health protocols ang mahimo isyuhan sang citation ticket
Mahimo nila nga bayran sa city treasurer’s office ang multa.
200 pesos ang multa para sa taga bacolod kag 300 pesos naman para sa indi taga bacolod.
Kun indi nila luyag magbayad sang multa mahimo man sila maka community service sa barangay.
Nagapaandam ang task force nga sumugod sa madason nga semana estriktuhon na nila ang pag issue sang citation ticket.