TESDA Director General Francisco Benitez pormal na nga nagbiya kag gin-turn-over ang pwesto kay 3rd District Congressman-elect Javi Benitez.
Antes pa na-appoint si TESDA Director General Francisco Kiko Benitez sa pwesto malapit man sa anum ka tuig siya nga nagserbe bilang congressman sang 3rd District sang Negros Occidental.
Pero pormal na nga gin-turn over ni Benitez ang posisyon sa iya hinablos nga si Congressman-elect Javier Miguel Benitez.
Ginapaabot niya ang supporta para sa hinablos nga alkalde sang Victorias City karon sa handom nga mapadayon ang mga nasuguran nila nga legasiya halin sang nangin kongresista pa sang Distrito si Bacolod City Mayor Albee Benitez nga karon congressman-elect sang siudad.
Sa pagpamuno ni Congressman Kiko nahatagan atensyon ang pagpasanyog sang edukasyon ilabi na nga nangin kabahin siya sang Education Committee ukon EDCOM sang kongreso. Kapin sa P3B nga balor sang national and tourism road ang napatuman sa idalom sang iya liderato.
Gintagaan niya man sang prayoridad pinaagi sa mga natukod nga layi ang creative industry, kampanya sa environment protection and conservation, ikaayong lawas, housing kag enterprised-based training para mapabaskog ang mga livelihood programs.
Bilang pamuno sang TESDA ginapaabot niya nga ang Victorias City ang magaserbe nga hub para sa state-of-the-art Regional Training and Innovation Center sa Negros Island Region.