Mga tenants sang Manokan Country nagahinyo sang extension antes suguran sang siudad ang natalana nga pagpasira sang baligyaan.
Ginapaabot sa pag dayalogo sang katapo sang Manokan Country Vendors Brotherhood Association nga paboran ni Mayor Albee Benitez ang ginahinyo nga extension antes pa sang natalana nga pagpasira sang ila mga baligyaan pagkatapos sang Hulyo 5.
Ginpahayag ni Tess Mondres, spokesperson sang mga tenants nga maplastar anay sila sa duta nga plano arkilahan sang LGU sa likod sang Bacolod City Government Center.
Ini ang ginapaabot sang mga tenants nga mangin permanente nga salayluhan sa tion nga suguran na ang pag-demolish sang Manokan.
Ang SM Primeholdings Incorporated nga amo ang magapatuman sang development project sa 3 – hectare property sang siudad sa reclamation area ang nagtukod sang temporary facility para sa mga tenants sa parking area sang mall.
Ugaling asta karon wala sang tenants nga nagpabutyag sang interes nga magsaylo diri bisan pa libre ang pag gamit nila sang pasilidad sa sulod sang 18 ka bulan.
Ginsiling ni Mayor Albee Benitez nga ano man ang mangin resulta sang ila ginapaabot nga pagdayalogo upod sa mga tenants magapadayon ang joint development project sa Manokan.