Nagahigda sa higad sang dalan malapit sa kampo ang lalaki sang masapwan sang naglabay nga concerned citizen, sa Barangay Salvacion, banwa sang Murcia, Domingo sang aga.
May mga pilas sa lawas kag ulo ang biktima nga ginkilala kay alyas “Clyde”, 19-anyos, residente sang Barangay Alangilan sa Bacolod.
Sang mag-responde ang katapo sang Murcia Police Station, ila nakit-an ang motorsiklo sang biktima sa sulod sang kampo.
Suno kay Capt. Honey Labaro, deputy chief sang Murcia Police Station, base sa ila imbestigasyon, isa ka traffic incident ang nagluntad, kun sa diin naglapaw ang motorsiklo sang biktima sa kampo, kag siya ang natumba sa higad sang dalan.
Wala sang CCTV ang lugar gani wala man mahibaluan sang kapulisan kung pila na ka oras ang nagligad sang nagluntad ang insidente, sang nasapwan ang biktima.
Posible suno sa pulis nga nadulaan sang kontrol ang biktima sa ginamaneho niya nga motorsiklo.
Suno sa iya mga kaupdanan, nagatambay sila sa isa ka bar sang nag-desisyon ang biktima nga magpauli na.
Madulom ang lugar nga natabuan sang insidente.
Dead on arrival sa Murcia Health Unit ang biktima.
Isa ka aeronautics student si Clyde sa Asian College of Aeronautics-Bacolod.
Sa ginpagwa nga pahayag sang eskwelahan sa ila social media account, nagpabutyag sila sang kasubo sa pagtaliwan sang ila estudyante.
