Public consultation kag hearing ginpatawag ni Mayor Albee upod sa mga TODA kag barangay officials para masolbar ang problema tuga sang colorum nga e-bike kag e-trike sa siudad.
Nagtipon sa Bacolod City Government Center ang ginatus nga mga opisyal kag katapo sang Tricycle Operators and Drivers Association para sa isa ka seminar kaina sang aga.
Sa paghinun-anon kay Mayor Albee Benitez ila ginpalab-ot ang mga kabudlayan nga natuga sang colorum nga e-bike kag e-trike sa ila matag adlaw nga palangabuhian.
Sa record sang siudad may masobra 7,000 ang nagabyahe nga tricycle sa siudad nga may prangkisa. Samtang nagalab-ot naman sa 22,000 ang e-bike kag e trike sa mga kabarangayan.
Para sa alkalde kinahanglan nga mapat ud ang mga tikang agud masolusyunan ang problema amo nga nagpatawag siya sang public consultation kag hearing.
Ginapaabot niya nga magatambong ang mga barangay officials kag mga natungdan nga katapo sang transport organization.