Tatlo ka mga persona nga nagapang-budol gamit ang peke nga artifical insemination nadakpan sa entrapment operation sang kapulisan sa Barangay Tangub sa Bacolod.
Masami mga negosyante kag mga landowners nga nagabaligya sang balay ang target sang mga nadakpan nga scammers nga sanday Arnold Reyes nga taga-Manila kag mag-amay nga Alan kag Nelson Elera.
Ginsiling ni Police Lieutenant Colonel Joery Puerto nga sang 2022, kasubong nga nagapakuno-kuno nga buyer sang balay ang mga suspek upod sa nakapalagyo nga Arabo.
Modus nila ang magbakal sang artificial insemination product nga ginagamit sa pagpabusong sang baka nga amo ang itanyag sang ka-grupo nila nga mga scammers sa ila mga biktima.
Pero sa sulod sang mga naka-pack nga karton, mga beverage products ang nakatago kag indi mga artificial insemination product.
Kahapon isa sa mga biktima ang nagpa-alinton gilayon sa katapo sang Police Station 8 kag City Investigation and Detection Management Unit sang BCPO resulta nga nagkadakpan ang pila sa mga katapo sang pangayaw nga budol-budol sa ginpatuman nga entrapment operation sa Barangay Tangub.
Nagapati ang kapulisan nga yari lang sa siudad ang mga kaupdanan sang mga suspek.
Gani nagapaandam sila sa publiko nga indi gid mag padaso-daso sa mga transaksyon nga daw indi mapatihan agud indi man mabiktima sang pagpaniplang.