Aprobado na sang konseho sang Bacolod ang accreditation sang Metro Towing Services. Gani sa madasun nga semana ginapasalig sang Bacolod Traffic Authority Office ang full implementation sang towing ordinance.
Ginsiling ni Councilor Al Victor Espino pamuno sang Committee on Transportation and Traffic, nga magluwas sa Metro Towing Services may tatlo pa ka mga komboyahan nga pila diri ang nabase sa Manila nga luyag mag operate sa siudad.
Ini ang ginatun-an na sang komitiba antes pa man ang posible nga pagdihon sang separado nga kasugtanan angut sa pagpatuman sang Towing and Clamping Ordinance.
Sandig sa ordinansa sarang makapangita sang dugang nga towing service ang siudad.
Samtang kahapon lang na-remit sang MTS ang 25 percent income share sang siudad gikan sa collection fee sa towing operation.
Nag issue naman sila sang post dated check sa City Treasurer’s Office para sa P600,000 balayran halin sa collection fee sa clamping operation.