Tatlo ka mga john does sa election day shooting sa siudad sang Silay ang nakilal-an na.
Suno kay Negros Occidental PNP Provincial Director, Col Rainerio de Chavez, padayon ang ila nga pag operate kag naga hulat sila sang ayhan pag papanaog sang korte sang warrant of arrest sa tatlo ukon ang pag serbe sang search warrant sa lugar sang mga natungdan.
Duha ang napatay kag pito ang nasamaran sang matabo ang shooting incident sa atubang sang ginasiling headquarters sang Team Asenso – Silay sa McKinley Street sa Brgy Mambulac sa Silay City sang Mayo 12.
Sang Mayo 14, na file na ang murder and frustrated murder charges batuk kay Barangay Captain Arnie Benedicto sang Lantad, Silay kasunod sang inquest proceedings sa Silay City Prosecutor’s Office.
Gin-report nga ang siyam mga volunteers sang partido ni Mayor Joedith Gallego kag naga bantay sa lugar angut sa gin-alegar vote buying.
Suno kay de Chavez iga-raffle na lamang ang kaso ni Benedicto.
Ang korte nga maga uyat sang kaso amo na ang maga pat-od kun diin iga remit si Benedicto nga tubtob sa karon suno kay De Chavez yara na detain sa CIDG.
Ginsiling man ni De Chavez nga sa provincial level nakabig na nga election related ang amo nga shooting incident.
Ini ang napatuhoy na sa talatapan sa Manila. Ginsiling naman sang COMELEC sa press conference sang Lunes nga naga laum sila nga magaserbe nga leksyon ang natabo sa Silay City.
Nagapati si COMELEC chairperson, George Erwin Garcia nga ang kalakasan nga nagluntad indi mangin basehan sang COMELEC sa gina paabot nga Barangay kag SK ELections.
Pero kun vote-buying naman ang pagahambalan suno kay Commissioner Ernesto Ferdinand Maceda indi nila pagkalipatan ang natabo sa Silay bangud ang natabo yara sa context sang vote-buying.