Sa video nga kuha ni Arthur Yap, makita nga madasig nga ginlamon sang kalayo ang second floor sang isa ka balay sa Magsaysay Avenue sa Barangay Singcang-Airport sa Bacolod City, Domingo sang hapon.
Naglapta ang kalayo sa duha pa gid nga katupad nga mga balay. Suno sa kay FO2 Rolin Paulan, Chief Investigator sang BFP-Bacolod nga totally destroyed ang tatlo ka mga balay sa nagluntad nga sunog.
Nagdangat sa 1st alarm ang sunog nga nagtuga sang P160,000 nga balor sang kahalitan.
Ginkilala ang tag-iya sang tatlo ka mga balay nga sanday Ercel Sonalan, Jesus Rodriguez kag Eduardo Barbas.
Dugang pa sang BFP-Bacolod, nagsugod ang kalayo sa kusina kag kwarto sang balay ni Sonalan. “Electrical Ignition” naman ang gina lantaw nga gintunaan sang kalayo.