Isa ka Special Investigation Task Group ang ginporma sang Bacolod City Police Office para tutukan ang kaso sang pagpatay sa 17 anyos nga si Freya.
Suno kay Police Captain Francis Depasucat, gintukod ang task force para mapadasig ang imbestigasyon kag para matagaan sang hustisya ang brutal nga kamatayon sang menor de edad.
Na autopsy na ang bangkay sang biktima nga nasapwan Miyerkules sang hapon sa may likod sang Pope John paul the second tower sa Reclamation Area sa Bacolod nga sakop pa sang Barangay 12.
Nakahigot ang iya mga kamot kag wala sang delargo ukon shorts pati na underwear ang biktima.
May mga lagub siya sa guya.
Ginalantaw man sang PNP ang posibilidad nga basi ginwigit lang sa kakugnan ang iya nga bangkay bangud wala na sang iban pa nga bagay nga na recover sa tupad sang bangkay.
Sa tupad sang lugar kun sa diin siya nasapwan may yara man sang bodega.
Nasugilanon naman sang PNP ang iya nga pamilya para makakuha sang dugang pa gid nga mga impormasyon.
Nagpasalamat ang PNP sa gintanyag nga P100,000 sang Bacolod LGU para sa makatudlo sa suspek sa krimen.*