Task Force Tubig Hayahay naporma para mapahagan-hagan ang epekto sang kakulang sang water supply sa tig-ilinit.
Agud nga mas mahandaan kag mapahagan-hagan ang epekto sang kakulang sang water supply sa siudad karon nga tig-ilinit mangin prayoridad sang natukod nga Task Force Tubig Hayahay ang monitoring kag pagpasiguro sang mga nagakaigo nga tikang , nalakip diri ang pag-rasyon sang tubig sa mga barangay.
Kabahin sa nakasugtan sa pagsinapol ni Mayor Albee Benitez upod sa Baciwa-PrimeWater kag Negros Power ang pag-energize sang bulk water supply project sa Matab-ang River agud ma-inject ang dugang nga 3 million liters a day ukon MLD nga supply sang tubig.
Plano sang siudad nga magdugang sang water tanks nga ipahamtang sa Barangay Mansilingan, Taculing, Villamonte, Estefania, Alijis, Barangay 30, Felisa, Tangub, Handumanan kag Cabug nga ginapaabot maapektuhan sang pag-ninit sang water supply.
Halin sa 84 MLD sang nagligad nga sinemana, nanaog sa 77MLD ang kabilugan nga supply sang Baciwa-PrimeWater.
Paagi sa Bacolod Bulk Water Incoporated plano sang water distribution utility nga mag-tap sang pipeline sa Caliban River sa banwa sang Murcia para sa ginapaabot dugang nga 5MLD sa masunod nga binulan.