Nakumpiskar sang Task Force Botagoy ang kapin 50 kilos nga baboy nga ginakabig hot meat sa Bangga Lote, Barangay Alijis, sa Bacolod kahapon.
Ini ang una nga tion nga naka kumpiskar ang task force sang hot meat matapos gin balasa ni Mayor Albee Benitez ang grupo.
Suno kay City Veterinarian Dr. Maria Agueda Trinidad Dela Torre, pamuno sang task force, nagapatigayon sila sang routine inspection sang ila nalabyan ang lugar kag sang gin usisa wala naglabay sa slaughterhouse ang gin ihaw nga baboy kag makabig nga ilegal.
Ginbubu-an sang used oil ang hot meat kag ginlubong sa slaughterhouse sa Brgy. Handumanan.
Nagpatigayon man sang inspeksyon ang Task Force Butagoy sa pila ka mga ilihawan kag storage facilities ang task force sa siudad sang Bacolod kahapon.
Ang Task Force, nga ginapangunahan ni Dra. Ma. Agueda Trinidad dela Torre, ang gin-reorganize ni Mayor Albee Benitez paagi sa Executive Order No. 007 sadtong Hulyo 13.
Ini ang ginabug-usan sang City Mayor’s Office, City Veterinary Office, Committee on Markets sang Sangguniang Panlungsod, National Meat Inspection Service, Philippine National Police, City Legal Office kag Public Information Office.
Nalakip sa mga gin-usisa ang mga storage facilities sang kilala nga mga brands kag subong man fastfood restaurants.
Suno kay Dela Torre, ang regular nga inspection ang agud masiguro nga may yara sang proper handling kag storage sang mga produkto gikan sa luwas sang pungsod.