Tanjay City ang ginbaha matapos mag saka ang water level sa suba.
Bug-os nga klase sa Negros Oriental subong nga Hwebes suspendido. Imbes nga estudyante, tubig baha sa karon ang unod sang Tanjay National High School bangud sang mabaskog nga ulan sa lugar.
Sa litrato nga kuha sang manunudlo nga si Nenen Miraflor Saycon, makita nga nag sulod na sa mismo mga classroom ang tubig baha.
Ang ila nga library ang ginbaha man gani pila ka mga libro ang nagkalabasa. Magluwas sa eskwelahan, pila ka mga balay man sa Tanjay City ang apektado bangud sang pag saka sang tubig.
Suno kay Lt Col Richard Gadingan, hepe sang Tanjay PNP, sa ila monitoring, ang pag saka sang tubig sa suba amo ang nangin kabangdanan sa pag baha sa lugar.
Nag lab-ot sa critical level ukon red warning kaina sang aga ang tubig sa suba gani gin abiso man sa mga naga istar malapit sa suba ang pag evacuate.
Magluwas sa Tanjay City, padayon ang mabaskog nga pag bubo sang ulan sa bug-os nga probinsya gani si Negros Oriental Governor Roel Degamo ang nag pa gwa sang Executive Order agud suspendehon ang klase sa tanan nga lebel subong nga adlaw.