Pasulod pa lang sa baybay sa Barangay Poblacion sa San Enrique pilahay na ang mga salakyan kag motorsiklo.
Sa higad mismo sang baybay daw naga excursion lang ang mga tawo. Tanan masako sa pagpanguha sang tahong!
Ang ini nga pamilya gikan pa sa La Carlota City. Las otso pa lang sang aga ari na sila para manguha man sang tahong.
Las diyes sang aga may duha na sila ka sako nga tahong.
Si Lancer Ordaniel naman taga La Castellana pa naga bulante siya sang uling sa San Enrique kag antes mag puli nanguha man sang tahong para ipanagtag sa ila nga lugar.
Bata tigulang masako sa pagpanguha sang tahong. Kahapon kuno nag sugod sa pagdagsa sa higad sang baybay ang mga tahong matapos ang maulanon nga weekend.
Madasig naglapta sa social media ang amo nga insidente gani ang mga gikan sa mga kaiping nga mga banwa kag siudad ang nagpadulong man diri.
Ang ini nga grupo duha ka oras kag tunga ang ginbiyahe para maka panguha man sang tahong. Magpauli kinahanglan pa ini nila nga ikarga sa karo ang sinako nga tahong pasaka sa Nagassi sa La Carlota.
Suno sa kay Joel Pedrosa, consultant sa Fisheries Division sang Municipal Agriculture Office sang banwa, masami nagadagsa ang tahong matapos ang malain nga tiempo. Gina ukay ini sang balud kag gina dala sa higad sang baybay.
Bangud nga kada tapos sang bagyo ukon makusog nga ulan naga dagsa ang tahong, ila na ini nga gina kabig nga blessing gikan sa ibabaw pagkatapos sang unos.