Ginbalikan liwat sang enforcement team sang City Legal Office ang sapa sa may tupad sang North Terminal sa Bacolod.
May illegal structures na sila nga una nga na demolish kag may isa pa nga nagapabilin.
Ang mga structure mga kalan-an kag tululugan nga yara sa kilid kag sa ibabaw sang sapa.
Suno kay Retired Col. Levy Pangue, ang pamuno sang enforcement team sang CLO, nagpasalig ang tag-iya sang nagapabilin nga structure nga sila na mismo ang magaguba sini, tagaan lang sila tubtob August 11.
Iya sila nga gintugutan samtang sa sulod nga parte sa kilid sang sapa may nadiskubrehan nga liwat na naman nga gintukod nga illegal structures gani gin hatagan sila warning nga pwede sila kasuhan kag gub-on ang structure.
Kabahin ini sa clearing operation nga ginahimo sang siudad para mahawanan ang mga dalanon kag mga sapa para mapa hagan-hagan ang baha sa siudad.
