Nagsungka sa otoridad ang isa sa mga suspek sa pagpatay kay Negros Oriental Governor Roel Degamo kag walo pa ka iban.
Sa isa ka press conference, ginpahayag ni Special Task Force Degamo head kag Interior and Local Government Secretary Benhur Abalos, ila gina abi-abi ang pagsungka sang isa sa mga suspek.
Suno kay Abalos, ang suspek ang napaidalum na sa kustodiya sang Armed Forces of the Philippines kag iga turn-over sa NBI.
Dugang pa ni Abalos nga ang suspek ang may importante nga mga impormasyon sa kaso.
Suno naman Special Joint Task Force Negros spokesperson Major Cenon Pancito III, anum sa 10 na ka mga suspek ang na account sang otoridad, base sa CCTV footage.
Samtang ginkumpirmar ni Atty. Ferdinand Topacio, legal counsel ni Negros Oriental Representative Arnolfo “Arnie” Teves nga magatambong ang iya kliyente sa hearing nga patigayunon sang House Ethics Committee angut sa iya absence sa kongreso pero via video conference.
Suno kay Topacio nga wala ginpahanugutan ni Speaker Martin Romualdez ang pangabay ni Teves nga two-month leave nga karon yara sa abroad.
Palayag ni Topacio nga my impormasyon nga luyag ni Teves ipakigbahin sa House Committee on Ethics kon ngaa gina frame-up” siya kag kon ngaa indi siya personal makatambong sa hearing.
Nag expire ang travel authority ni Teves sadtong Marso 9 kag karon nagapangatubang sang criminal complaints may kaangtanan sa illegal posession of firearms kag mga pinatyanay sa Negros Oriental sadtong tuig 2019.
Si Teves man ang ginatudlo sang mga suspetsado nga nadakpan sang kapulisan nga mastermind sa pagpatay kay anay Negros Oriental Governor Roel Degamo.