Water source sang Barangay Mailum sa siudad sang Bago ang apektado sang ash fall kasunod sang pagbuga sang bulkan Kanlaon sang Sabado.
Walo ka iban pa gid nga barangay sa Bago na-igo man sang ash fall.
Ginsiling ni Dr Merijene Ortizo ang pamuno sang Disaster Risk Reduction Management Office sang Bago, may 46 tanan ka mga purok sa Barangay Mailum, Dulao, Ma-ao, Binubuhan, Abuanan, Antipuluan, Ilijan, Tabunan kag Bacong ang na-igo sang ash fall matapos nga magbuga ang bulkan Kanlaon sang maka duha ka beses sang Sabado sang hapon.
Magluwas sa ash fall mabaskog man ang baho sang sulfur.
Pero wala sang evacuation nga ginpatuman suno kay Dr Ortizo.
Tigayon na sila nga nag panagtag sang n95 masks kag ang kada barangay nakahibalo naman kun ano ang ila nga himuon sa kasubong nga mga sitwasyon.
Ugaling kay spring ukon open ang water sources sang Mailum nga napahamtang mga 7 to 8 kilometers gikan sa bulkan, apektado ang ila nga supply sang tubig rason nga may water rationing.
Tigayon nga nag padala ang probinsya sang water tanker with filtration system para mabuligan man ang apektado.
May 9,827 ka pumuluyo ang Mailum.
Samtang, sa record sang PHIVOLCS, may 32 ka volcanic quakes ang bulkan Kanlaon sa nagligad nga 24 ka oras, may 4,604 ka tonelada sang sulfur dioxide flux kag 200 metro ang plume sini.
Padayon ang paghabok sang bulkan.
Suno kay Mari – Andylene Quintia ang resident volcanologist sang PHIVOLCS nga na base sa La Carlota City, humalin pa sang Enero 10 ang paghabok sang eastern upper slope sang bulkan kag inflation-deflation cycles naman ang na-record sa western upper and eastern middle slopes.
“As of now ga tap-ok pa sa Brgy Mailum. Wala naman ga ash fall ara gyapon ang baho sang asupre in Mailum. Ang tubig apektado. Subong nag coordinate na kami sa City Health Office para sa WASH team – Water Sanitation and Hygiene Cluster for them to conduct physico chemical analysis. Ipa laboratory namon ang open nga sources of water”, suno kay Ortizo.