Supply sang manok kag table eggs sa probinsya ang indi ma apektuhan. Ini suno sa Provincial Veterinary Office kasunod sang pag patuman sang Executive Order nga naga ban sang live domestic kag wild birds.
Naga pa gwa ang probinsya sang 2.4 million ka itlog sa kada bulan.
Kay tungod nga gina patuman sa karon ang pag ban sang table eggs gikan sa isla sang Panay, Guimaras, Luzon kag Mindanao, base sa gin pa gwa nga Executive Order sang Gobernador, gin kasugtan nga una anay pun-an ang kinahanglanon sang Negros Occidental antes mag supply sa iban.
Sa datus sang Provincial Veterinary Office, 325,000 ka itlog ukon table eggs sa kada bulan ang gina supply sa Negros Occidental gikan sa Iloilo kag 666,667 naman gikan sa Capiz.
Suno kay Dr Placeda Lemana, OIC-Provincial Veterinarian, sa ini nga pamaagi malikawan ang pag kulang sa supply.
Indi naman ma apektuhan ang supply sang manok. Suno kay Lemana, ini bangud sa EO ni Governor Eugenio Jose Lacson, live nga domestic kag wild birds man lamang ang gina dumilian kag gina tugutan ang pag sulod sang dressed chicken.
Kasunod sang bird flu case sa Capiz, nag pa gwa EO nga naga patuman sang total ban sa live wild kag domestic birds gikan sa Luzon, Mindanao, Panay kag Guimaras lakip man ang ila sini nga mga produkto, egg and manure gikan sa mga lugar nga may kaso sang bird flu. Ini sa tinutuyo nga mapangapinan ang 8 billion peso poultry industry sang Negros Occidental.
Padayon naman ang monitoring sa mga lugar nga gina sayuhan sang wild birds. Isa na diri ang Sipalay City nga naga serbe pathway sang migratory birds.