Dako ang posibilidad nga may super big time roll back nga matabo sa madason nga semana pero transport strike madayon!
Ginsiling na ni Department of Energy Secretary Alfonso Cusi nga kun maga pabilin nga manubo ang bili sang produkto petrolyo sa World Market, may dako nga roll back sa bili sang produkto petrolyo sa madason nga semana.
Ang presyo sang krudo sa Dubai halin sa 122.61 US dollars ang kada barrel, nanaog sa 104 us dollars per barrel.
Ang liwat nga paglockdown sang China tuga sang Covid-19 nga nagpa nubo sa ila nga demand para sa produkto petrolyo kag ang negosasyon para sa ceasefire sa tunga sang Russia kag Ukraine ang gina tudlo nga mga rason sang pagnubo sang bili sang petroleum products sa World Market.
Gina bulubanta nga mahimo mag roll back sang masobra sa dose pesos ang kada litro sang diesel kag malapit sa siyete pesos naman sa gasolina kag masobra sa nuebe pesos sa kerosene.
Sa pihak sini, ginkumpirma ni Diego Malacad, secretary general sang UNDOC nga madayon sa gihapon ang duha ka adlaw nga untat biyahe sa Negros Occidental sa Lunes kag sa Martes.