Ginklaro sang OIC fire marshall sang Don Salvador Benedicto Fire Station nga si SFO2 Laddy Maglasang nga ang natabo kaina nga sunog sa kilid sang highway sa Barangay Kumaliskis sa banwa ang isa lang ka grass fire kag indi ini forest fire.
Mga hilamon lang suno kay Maglasang ang nasunog kag wala sang puno sang kahoy.
Kapin tunga sa hektarya sang kahilamon nga yara sa banglid ang nasunog suno sa BFP.
Ang abo sang mga nagapanutod nga ginpalid sang hangin amo ang posible gintunaan sang kalayo bangud sa laya na ang dalum nga bahin sang hilamon.
Ginpahayag ni Community Environment and Natural Resources Officer Engineer Joan Gerangaya nga isa ka forest fire ang nag luntad sa Spur 21 sa Don Salvador Benedicto kag 250 tanan ka mga puno sang kahoy ang nasunog.
Si Gerangaya nagsiling nga nag sugod gid man ang kalayo sa mga nasunog nga hilamon kag nalab-ot man ang mga puno sang kahoy pero iya gin siling nga sarang pa man ini sa gihapon nga mag tubo.