PNP gina-usisa ang nakuha nga CCTV footage sang gunmen nga posible may kahilabtanan sa pagpatay sa pulis sa Bacolod.
Suno kay Police Lieutenant Colonel Jovil Sedel, pamuno sang Investigation and Detection Management Unit sang Bacolod City Police Office, ila pa igakumpara ang mga nakuha nga video footage sa iban nga CCTV video sang riding-in-tandem nga nakit-an nagpalagyo halin sa crime scene pakadto sa area sang dalan Lacson.
Ini agud man makakuha sang lead ang kapulisan angut sa pagpatay kay Police Staff Sergeant Joseph Nepomuceno Jr. sa Rosario Street sang Agosto 29.
Kabahin sa mga anggulo nga ila ginapadalman ang bahin sa trabaho sang ginpatay nga pulis kag kampanya kontra sa iligal nga droga.
Ginsiling man Sedel nga padayon man ang ginahimu nga investigation sang katapo sang Special Investigation Task Group sa kaso sang ginpatay nga si Glenn Paul Castillo nga ginpugutan pa sang ulo sa dalan Rosario, ang lugar kun diin man napatay si Nepomuceno, sang Agosto 31.
Ang pamilya Castillo ang nagpalab-ot sang pagkabalaka bangud may mga nagapakilala nga pulis nga nagakadto sa puluy-an sang napatay nga biktima sa Barangay Cabug pati na sa iya nga baligyaan sa Sum-ag.
Tubtob karon indi pa man mapat-ud sang SITG kun ano ang koneksyon sang magkasunod nga kaso sang pagpatay sa siudad.
Pero nag-gwa nga si Nepomuceno nga katapo sang City Drug Enforcement unit ang kabahin sa mga operatiba nga nagdakop kay Castillo kag live-in partner sini nga si Analie Baldevieso sang nagligad nga Agosto 21.